កំណត់សំអាង (កិច្ចសន្យាធានារ៉ាប់រងបណ្ដោះអាសន្ន)
1. កម្មវត្ថុនៃកំណត់សំអាង
កំណត់សំអាង ជាកិច្ចសន្យាធានារ៉ាប់រងបណ្ដោះអាសន្ន ដែលផ្តល់ជូនដោយ ក្រុមហ៊ុន មេនូឡាយហ្វ៍ (ខេមបូឌា) ភីអិលស៊ី (តទៅនេះហៅកាត់ថា “ក្រុមហ៊ុន”) មុនការអនុម័តកិច្ចសន្យាធានារ៉ាប់រងស្ថាពរ ដោយអនុលោមតាម ខ និងលក្ខខណ្ឌនៃកំណត់សំអាងនេះ។
2. ថិរវេលា និងសុពលភាពនៃកំណត់សំអាង
កំណត់សំអាងនេះ នឹងមានសុពលភាព បន្ទាប់ពីសំណុំឯកសារនៃទម្រង់បែបបទនៃការស្នើសុំការធានារ៉ាប់រងត្រូវបានបញ្ជូន និងបុព្វលាភធានារ៉ាប់រងដំបូងត្រូវបានបង់គ្រប់ចំនួនមកកាន់ក្រុមហ៊ុន។
កំណត់សំអាងនេះ នឹងត្រូវបញ្ចប់សុពលភាពនៅកាលបរិច្ឆេទណាមួយខាងក្រោម (ណាមួយដែលកើតឡើងមុនគេ)៖
(ក) កាលបរិច្ឆេទផ្តល់ជូនបណ្ណសន្យារ៉ាប់រង
(ខ) កាលបរិច្ឆេទដែលក្រុមហ៊ុនបានផ្ញើលិខិតជូនដំណឹងទៅកាន់អ្នកស្នើសុំការធានារ៉ាប់រង អំពីការបដិសេធសំណើសុំការធានារ៉ាប់រង ឬ
(គ) កៅសិប (90) ថ្ងៃ គិតពីកាលបរិច្ឆេទដែលទម្រង់បែបបទស្នើសុំការធានារ៉ាប់រង ឬទម្រង់បែបបទយល់ព្រមលើការដាក់ពាក្យស្នើសុំការធានារ៉ាប់រងជាលក្ខណៈអេឡិចត្រូនិកត្រូវបានចុះហត្ថលេខា។
3. សេចក្ដីសង្ខេបនៃការធានារ៉ាប់រងបណ្ដោះអាសន្ន និងចំនួនទឹកប្រាក់ធានារ៉ាប់រង
ក្នុងករណីអ្នកត្រូវបានធានារ៉ាប់រងទទួលមរណភាព ក្នុងអំឡុងពេលកំណត់សំអាងនេះមានសុពលភាព និងមុនកាលបរិច្ឆេទផ្តល់ជូនបណ្ណសន្យារ៉ាប់រងចាប់ផ្តើមមានសុពលភាព ទំនួលខុសត្រូវរបស់ក្រុមហ៊ុនដែលមានក្រោមកិច្ចសន្យាធានារ៉ាប់រងនេះ ត្រូវកំណត់ត្រឹម៖
(ក) ប្រាំបួនពាន់ (9,000) ដុល្លារអាម៉េ រិក (ឬចំនួនក្នុងរូបិយប័ណ្ណផ្សេងដែលសមមូល) ប្រសិនបើទឹកប្រាក់ធានារ៉ាប់រងដែលបានស្នើសុំមានចំនួនច្រើនជាង ឬ ស្មើប្រាំបួនពាន់ (9,000) ដុល្លារអាម៉េ រិក ឬ
(ខ) ស្មើនឹងចំនួនទឹកប្រាក់ធានារ៉ាប់រងដែលបានស្នើសុំ ប្រសិនបើទឹកប្រាក់ធានារ៉ាប់រងដែលបានស្នើសុំមានចំនួនតិចជាង ប្រាំបួនពាន់ (9,000) ដុល្លារអាម៉េ រិក។
ក្នុងករណីប្រាក់សំណងដែលត្រូវទូទាត់តាមកំណត់សំអាងនេះ មានចំនួនតិចជាងទឹកប្រាក់ធានារ៉ាប់រងដែលបានស្នើសុំ នោះក្រុមហ៊ុននឹងសងត្រលប់នូវបុព្វលាភធានារ៉ាប់រងសម្រាប់ទឹកប្រាក់ធានារ៉ាប់រងដែលលើស ជូនទៅឱ្យអ្នកទទួលផលដែលបានកំណត់ក្នុងទម្រង់បែបបទស្នើសុំការធានារ៉ាប់រងដែលបានដាក់ជូនក្រុមហ៊ុន។
ភ្នាក់ងារធានារ៉ាប់រង ឬបុគ្គលិកលក់ផលិតផលធានារ៉ាប់រង ឬវេជ្ជបណ្ឌិត (ពិនិត្យសុខភាព) ពុំមានសិទ្ធិក្នុងការកែប្រែ កែតម្រូវ ឬផ្លាស់ប្តូរលើ ខ និងលក្ខខណ្ឌនៃកំណត់សំអាងនេះឡើយ ទោះបីក្នុងទម្រង់ណាមួយក៏ដោយ។
៤. ករណីមិនធានា
ក្រុមហ៊ុននឹងបដិសេធសំណើទាមទារសំណង ប្រសិនបើមរណភាពរបស់អ្នកត្រូវបានធានារ៉ាប់រង បង្កឡើងដោយផ្ទាល់ ឬដោយប្រយោល ទាំងស្រុង ឬដោយផ្នែក ពីមូលហេតុណាមួយដែលបានកំណត់ខាងក្រោម ហើយទំនួលខុសត្រូវរបស់ក្រុមហ៊ុនដែលមានក្រោមកិច្ចសន្យាធានារ៉ាប់រងនេះ ត្រូវកំណត់ត្រឹមការបង់ត្រលប់វិញនូវបុព្វលាភធានារ៉ាប់រងដំបូងដែលបានបង់រួច ដោយដកចេញវិញនូវការចំណាយលើការពិនិត្យសុខភាព (បើមាន) និង/ឬ និងចំណាយណាមួយដែលកើតឡើងសម្រាប់ការវាយតម្លៃធានារ៉ាប់រង (បើមាន)៖
(ក) ការសម្លាប់ខ្លួន ឬប៉ុនប៉ងសម្លាប់ខ្លួន ឬបង្ករបួសលើខ្លួនឯង ទោះបីស្ថិតនៅក្នុងស្ថានភាពផ្លូវចិត្តប្រក្រតី ឬមិនប្រក្រតីក៏ដោយ ឬ
(ខ) ការប្រើប្រាស់ឱសថដោយគ្មានវេជ្ជបញ្ជា គ្រឿងញៀន ឬសារជាតិពុលផ្សេងៗ ការសេពគ្រឿងស្រវឹងហួសកម្រិត
(គ) ការប្រព្រឹត្ត ឬប៉ុនប៉ងប្រព្រឹត្តបទល្មើសព្រហ្មទណ្ឌណាមួយ ដោយម្ចាស់បណ្ណសន្យារ៉ាប់រង ឬអ្នកត្រូវបានធានារ៉ាប់រង ឬអ្នកទទួលផល ឬ
(ឃ) ជំងឺអេដស៍ (AIDS) ឬផលវិបាក/ជំងឺណាមួយដែលទាក់ទងនឹងមេរោគហ៊ីវ (HIV) ឬ
(ង) មូលហេតុណាមួយដែលស្ថិតនៅក្រោមករណីមិនធានាក្នុងកិច្ចសន្យាធានារ៉ាប់រងដែលបានស្នើសុំ ឬ
(ច) ព្រឹត្តិការណ៍មួយ ឬព្រឹត្តិការណ៍ដែលកើតឡើងជាបន្តបន្ទាប់គ្នា ដែលបានកើតឡើងមុនពេលដែលកំណត់សំអាងចាប់ផ្តើមមានសុពលភាព។
ប្រសិនបើ ក្រុមហ៊ុនយល់ព្រមទទួលសំណើសុំការធានារ៉ាប់រងដែលបានស្នើសុំ ដោយពុំមានការប្រែប្រួល នោះបុព្វលាភធានារ៉ាប់រងដំបូងដែលបានទទួលនឹងត្រូវបានទទួលស្គាល់ជាបុព្វលាភធានារ៉ាប់រងដំបូងដែលត្រឹមត្រូវស្របតាមបណ្ណសន្យារ៉ាប់រង។
ប្រសិនបើ ក្រុមហ៊ុនបដិសេធទម្រង់បែបបទស្នើសុំការធានារ៉ាប់រង ឬអ្នកស្នើសុំបដិសេធមិនទទួលយកបណ្ណសន្យារ៉ាប់រងដោយប្រការណាមួយ នោះក្រុមហ៊ុននឹងបង់ត្រលប់វិញនូវបុព្វលាភធានារ៉ាប់រងដំបូងដែលបានបង់រួច ដោយដកចេញវិញនូវបំណុលណាមួយ (បើមាន) និងចំណាយណាមួយដែលកើតឡើងសម្រាប់ការវាយតម្លៃធានារ៉ាប់រង (បើមាន)។
ចាន់ រដ្ឋា
អគ្គនាយក
ក្រុមហ៊ុនមេនូឡាយហ្វ៍ (ខេមបូឌា) ភីអិលស៊ី
អគារធីខេសេនត្រល លេខ ១២ ជាន់ទី ១៤ ផ្លូវលេខ ២៨៩ សង្កាត់បឹងកក់ទី១ ខណ្ឌទួលគោក រាជធានីភ្នំពេញ
ផ្នែកសេវាបម្រើអតិថិជន (ទូរសព្ទឥតគិតថ្លៃ)៖ ១៨០០ ២១១ ២១១ www.manulife.com.kh www.facebook.com/ManulifeKH
កំណត់សម្គាល់
ប្រសិនបើលោកអ្នកពុំទាន់ទទួលបានកិច្ចសន្យាធានារ៉ាប់រង ក្នុងរយ:ពេល កៅសិប (90) ថ្ងៃ ចាប់ពីកាលបរិច្ឆេទស្នើសុំការធានារ៉ាប់រង សូមមេត្តាទាក់ទងមកក្រុមហ៊ុនដើម្បីសាកសួរព័ត៌មាន។
ក្រុមហ៊ុន មេនូឡាយហ្វ៍ មិនទទួលយកការបង់បុព្វលាភធានារ៉ាប់រងជាសាច់ប្រាក់ទោះក្នុងកាលៈទេសៈណាក៏ដោយ។ ក្រុមហ៊ុន ហាមឃាត់ជាដាច់ខាត មិនឱ្យភ្នាក់ងារធានារ៉ាប់រង តំណាងផ្នែកលក់ និងបុគ្គលិករបស់ក្រុមហ៊ុនមេនូឡាយហ្វ៍ ប្រមូល ឬទទួលបុព្វលាភធានារ៉ាប់រងជាសាច់ប្រាក់ ឬមិនមែនជាសាច់ប្រាក់ តាមវិធីសាស្រ្តផ្សេងៗ (ដូចជា ការផ្ទេរប្រាក់តាមទូរសព្ទដៃ ឬទៅកាន់គណនីផ្ទាល់ខ្លួន) ជំនួសឱ្យក្រុមហ៊ុនឡើយ។ ក្រុមហ៊ុន មេនូឡាយហ្វ៍ មិនទទួលខុសត្រូវចំពោះការខាតបង់ណាមួយ ដែលកើតឡើងពីការបង់បុព្វលាភធានារ៉ាប់រងទៅកាន់បុគ្គលដែលមិនមានសិទ្ធិ ឬតាមរយៈវិធីបង់ប្រាក់ដែលមិនត្រូវបានអនុម័តដោយក្រុមហ៊ុននោះទេ។ ដើម្បីការពារ សិទ្ធិ និងផលប្រយោជន៍របស់ខ្លួនអតិថិជនត្រូវបង់បុព្វលាភធានារ៉ាប់រង តែតាមរយៈធនាគារដៃគូរបស់ក្រុមហ៊ុន មេនូឡាយហ្វ៍ ឬវិធីសាស្រ្តបង់ប្រាក់អេឡិចត្រូនិកផ្លូវការដែលបានអនុម័តដោយក្រុមហ៊ុនប៉ុណ្ណោះ។