រត់ប្រណាំងអន្តរជាតិពាក់កណ្ដាលម៉ារ៉ាតុង នៅអង្គរនឹងមកដល់ក្នុងពេលឆាប់ៗនេះ
អ្នកដែលចូលចិត្តដើរផ្សងព្រេង និងអ្នករត់ប្រណាំងរាប់ពាន់នាក់មកពីជុំវិញពិភពលោកនឹងមកកាន់ឧទ្យានបុរាណអង្គរក្នុងខេត្តសៀមរាបដែលជាទីតាំងបេតិកភ័ណ្ឌពិភពលោករបស់អង្គការ UNESCO ដើម្បីចូលរួមរត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្តលើកទី ២៣ នៅថ្ងៃទី ០២ ខែធ្នូ ឆ្នាំ ២០១៨ នេះ។
ការរត់ប្រណាំងនេះមានគោលបំណងលើកកម្ពស់សុខភាព និងសុខុមាលភាព ព្រមទាំងរៃអង្គាសថវិកាដើម្បីគាំទ្រដល់អង្គការដែលជួយដល់កុមារក្រីក្រ និងជនរងគ្រោះដោយសារគ្រាប់មីននៅកម្ពុជា។ ក្នុងនោះក៏រួមមានមន្ទីរពេទ្យកុមារគន្ធបុផ្ផា មន្ទីរពេទ្យកុមារអង្គរ កាកបាទក្រហមកម្ពុជា និងអង្គការសប្បុរសធម៌ដទៃទៀតនៅក្នុងប្រទេសកម្ពុជា។
ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជារដ្ឋលេខាធិការក្រសួងទេសចរណ៍មានប្រសាសន៍ថា៖ «ឆ្នាំ ២០១៧ ជាឆ្នាំដំបូងបំផុតក្នុងប្រវត្តិសាស្ត្រនៃព្រឹត្តិការណ៍មួយនេះដែលយើងទទួលបានអ្នករត់ប្រណាំងជាង ១០ ០០០ នាក់មកពីជិត ៨០ ប្រទេសក្នុងពិភពលោក ហើយវាក៏ជាឆ្នាំដំបូងដែរ ដែលចំនួនអ្នករត់ប្រណាំងក្នុងស្រុកមានច្រើនជាងអ្នករត់ប្រណាំងអន្តរជាតិ ១២%។ កំណើននេះសរបញ្ជាក់ឲ្យឃើញពីការយល់ដឹងកាន់តែប្រសើរឡើងរបស់ប្រជាជនកម្ពុជាអំពីទិវារត់ប្រណាំងរបស់យើង ក៏ដូចជាសារៈសំខាន់នៃការរស់នៅប្រកបដោយសុខភាពល្អផងដែរ។ ដោយមានការគាំទ្រពីក្រុមហ៊ុន មេនូឡាយហ្វ៍ ក្រុមហ៊ុន Wurkz និងអ្នកឧបត្ថម្ភកម្មវិធីផ្សេងៗទៀត ខ្ញុំជឿជាក់ថាព្រឹត្តិការណ៍នេះនឹងនៅតែបន្តទទួលបានភាពជោគជ័យ ព្រមទាំងក្លាយទៅជាកម្មវិធីរៃអង្គាសថវិកាដ៏សំខាន់មួយដើម្បីបម្រើគោលដៅសប្បុរសធម៌នៅកម្ពុជាផងដែរ»។
លោក Robert Elliott អគ្គនាយកប្រតិបត្តិ និងនាយកចាត់ការទូទៅនៃក្រុមហ៊ុន មេនូឡាយហ្វ៍ ខេមបូឌា បានមានប្រសាសន៍ថា៖ «ឆ្នាំ ២០១៨ នេះជាឆ្នាំទី ៤ ហើយដែលយើងបានធ្វើជាម្ចាស់ឧបត្ថម្ភធំក្នុងព្រឹត្តិការណ៍រត់ប្រណាំងអន្តរជាតិពាក់កណ្ដាលម៉ារ៉ាតុងនៅអង្គរវត្តនេះ។ នេះជាឱកាសដ៏ល្អបំផុតមួយសម្រាប់យើងក្នុងការជួយឱ្យអតិថិជន បុគ្គលិក និងសហគមន៍របស់យើងមានសុខភាពល្អ ភាពសកម្ម និងជីវិតដ៏ប្រសើរមួយ»។
ក្នុងឆ្នាំនេះ ក្រុមហ៊ុន មេនូឡាយហ្វ៍ នឹងនៅតែបន្តប្រារព្ធកម្មវិធីពិពរណ៍ដ៏អស្ចារ្យមួយរបស់ខ្លួនទាក់ទងនឹងព្រឹត្តិការណ៍រត់ប្រណាំងនេះដែរ ហើយកម្មវិធីនោះមានឈ្មោះថា Manulife Move។ កម្មវិធីនេះនឹងបើកឱ្យសាធារណជនចូលរួមដោយឥតគិតថ្លៃរយៈពេលបីថ្ងៃចាប់ពីថ្ងៃទី ៣០ ខែវិច្ឆិកា ដល់ថ្ងៃទី ២ ខែធ្នូ។
អ្នករត់ប្រណាំងប្រមាណ ៥០០ នាក់ បានចូលរួមទិវារត់ប្រណាំងពាក់កណ្តាលម៉ារ៉ាតុងនៅអង្គរវត្តជាលើកដំបូងនៅឆ្នាំ ១៩៩៦ ហើយព្រឹត្តិការណ៍នេះកាន់តែមានប្រជាប្រិយភាពខ្លាំងឡើង ខណៈដែលចំនួនអ្នករត់ប្រណាំងបន្តកើនឡើងជារៀងរាល់ឆ្នាំ។ កាលពីឆ្នាំមុន ចំនួនអ្នកចុះឈ្មោះចូលរួមកើនឡើង ១០% ធៀបទៅនឹងឆ្នាំ ២០១៦ ដែលការកើនឡើងនេះបានធ្វើឲ្យព្រឹត្តិការណ៍នេះរួមចំណែកយ៉ាងសំខាន់ក្នុងវិស័យទេសចរណ៍នៅកម្ពុជា ជាពិសេសក្នុងខេត្តសៀមរាប។ការរត់ប្រណាំងនេះចាប់ផ្ដើមនៅម៉ោង ៥:៥០ នាទីព្រឹក ហើយអ្នករត់ប្រណាំងអាចចូលរួមក្នុងចម្ងាយប្រកួតចំនួន ៣ ប្រភេទ ដែលក្នុងនោះមានចម្ងាយ ២១ គីឡូម៉ែត្រ ១០ គីឡូម៉ែត្រ ឬ ៣ គីឡូម៉ែត្រ។
ដើម្បីចូលរួមក្នុងព្រឹត្តិការណ៍ដ៏អស្ចារ្យនេះ សូមចុះឈ្មោះក្នុងគេហទំព័រ www.cambodia-events.org។