ក្រុមហ៊ុន មេនូឡាយហ្វ៍ ខេមបូឌា រៀបចំជំនួបពិសេសរវាងគណៈគ្រប់គ្រងប្រតិបត្តិ និងទីប្រឹក្សាធានារ៉ាប់រងក្នុងកម្មវិធី «CEO Roadshow»
ភ្នំពេញ ថ្ងៃសុក្រ ទី ០៣ ខែកញ្ញា ឆ្នាំ ២០២១ - ក្រុមហ៊ុន មេនូឡាយហ្វ៍ ខេមបូឌា ដែលដឹកនាំដោយនាយកដ្ឋានផ្នែកលក់ បានរៀបចំកម្មវិធីជួបជុំពិសេសមួយដែលពុំធ្លាប់មានពីមុនមកតាមប្រព័ន្ធឌីជីថលឈ្មោះថា «CEO Roadshow»។ កម្មវិធីនេះក៏មានការចូលរួមពីសមាជិកគណ:គ្រប់គ្រងប្រតិបត្តិជាន់ខ្ពស់របស់ក្រុមហ៊ុន និងទីប្រឹក្សាធានារ៉ាប់រងប្រមាណ ៤.០០០ នាក់ ដែលមកពីបណ្តាការិយាល័យសាខាទាំងអស់នៅទូទាំងប្រទេស។
កម្មវិធី «CEO Roadshow» ត្រូវបានរៀបចំឡើងក្នុងគោលបំណងបង្ហាញពីការលើកទឹកចិត្ត ការគាំទ្រ និងការជួយជ្រោមជ្រែងពីសំណាក់ថ្នាក់ដឹកនាំរបស់ក្រុមហ៊ុន មេនូឡាយហ្វ៍ ខេមបូឌា ពីគ្រប់នាយកដ្ឋានពាក់ព័ន្ធ ចំពោះទីប្រឹក្សាធានារ៉ាប់រងរបស់ខ្លួនដើម្បីបន្តផ្តល់សេវាកម្មហិរញ្ញវត្ថុឈានមុខគេជូនដល់អតិថិជននៅកម្ពុជា។
ក្នុងនោះផងដែរ លោក Justin Helferich អគ្គនាយកប្រតិបត្តិ និងនាយកចាត់ការទូទៅនៃក្រុមហ៊ុន មេនូឡាយហ្វ៍ ខេមបូឌា បានមានប្រសាសន៍ថា លោកពិតជាមានសេចក្តីសោមនស្សរីករាយជាខ្លាំងដែលបានចូលរួមកម្មវិធីដ៏ពិសេសនេះជាលើកដំបូងប្រចាំក្រុមហ៊ុន មេនូឡាយហ្វ៍ ខេមបូឌា។ លោកបានបន្ថែមទៀតថា៖ «មិនថានាយកដ្ឋានផ្នែកលក់របស់យើងរីកចម្រើនប៉ុនណាទេ យើងនៅតែបន្តផ្តល់សេវាកម្មហិរញ្ញវត្ថុដ៏ល្អបំផុត ផ្តល់បទពិសោធន៍កាន់តែប្រសើរឡើងជូនអតិថិជន និងពង្រីកនូវវិសាលភាពរបស់យើងទៅគ្រប់តំបន់ដែលក្រុមគ្រួសារកម្ពុជាជាច្រើនទៀតសមនឹងទទួលបានការការពារពីការធានារ៉ាប់រងអាយុជីវិត។»
បន្ថែមពីលើនេះ លោក Zdenek Rylich នាយកគ្រប់គ្រងនាយកដ្ឋានផ្នែកលក់ក៏បានបន្តថា៖ «កម្មវិធីនេះពិតជាពិសេស និងគួរឲ្យស្ញប់ស្ញែងណាស់។ ទោះបីជាយើងកំពុងតែស្ថិតក្នុងស្ថានភាពដ៏លំបាកដោយសារជំងឺរាតត្បាតកូវីដ-១៩ ក្តីក៏ក្រុមការងាររបស់យើងនៅតែខិតខំបំពេញការងាររបស់ខ្លួនបានយ៉ាងល្អ ដោយមានការជ្រោមជ្រែង និងគាំទ្រពីនាយកដ្ឋានពាក់ព័ន្ធផ្សេងៗ ជាពិសេសពីសំណាក់លោកអគ្គនាយកប្រតិបត្តិ និងនាយកចាត់ការទូទៅផ្ទាល់តែម្តង។»
ក្នុងកម្មវិធីដដែល លោក ចៅ សម្បត្តិ នាយកគ្រប់គ្រងនាយកដ្ឋានប្រតិបត្តិការ លោកស្រី កាន់ ណារ៉ា នាយិកាគ្រប់គ្រងនាយកដ្ឋានអតិថិជន និងទីផ្សារ និងលោកស្រី រស់ ពេជ្រហេមី នាយិកាគ្រប់គ្រងនាយកដ្ឋានបច្ចេកវិទ្យា និងឌីជីថល ក៏បានចូលរួមធ្វើបច្ចុប្បន្នភាពទាក់ទងនឹងកិច្ចសហប្រតិបត្តិរវាងក្រុមហ៊ុន និងទីប្រឹក្សាធានារ៉ាប់រង ក៏ដូចជាយុទ្ធសាស្រ្តជំរុញផ្នែកលក់ប្រកបដោយប្រសិទ្ធភាព និរន្តរភាព និងរក្សាឲ្យបាននូវគុណភាពសេវាកម្មដ៏ល្អឥតខ្ចោះដល់អតិថិជនទាំងអស់របស់ក្រុមហ៊ុនផ្ទាល់តែម្តង៕
សម្រាប់ព័ត៌មានបន្ថែមពីផលិតផល និងសេវាកម្មរបស់ក្រុមហ៊ុន មេនូឡាយហ្វ៍ ខេមបូឌា សូមចូលទៅកាន់៖ www.manulife.com.kh/km/products.html និងព័ត៌មានថ្មីៗពីទំព័រហ្វេសប៊ុកផ្លូវការ «Manulife Cambodia» តាមរយៈ www.facebook.com/ManulifeKH ឬ ចូលទៅកាន់គេហទំព័រ www.manulife.com.kh។