ពិតណាស់ ដូចដែលយើងបានដឹងស្រាប់ហើយថា ទឹកនោមផ្អែម គឺជាជំងឺមួយប្រភេទដែលកើតឡើងដោយសារតែអ្នកជំងឺមានផ្ទុកជាតិស្ករច្រើនពេកក្នុងឈាមរបស់ពួកគេ ហើយនេះជាបញ្ហាសុខភាពដ៏ធំមួយសម្រាប់យើងគ្រប់គ្នាផងដែរ។ បើយោងទៅតាមការសិក្សាស្រាវជ្រាវមួយដែលចេញផ្សាយនៅលើទស្សនាវដ្តី Clinical Endocrinology & Metabolism មនុស្សប្រមាណជា ៤៦៣ លាននាក់នៅទូទាំងពិភពលោក បានកំពុងតែរស់នៅជាមួយនឹងជំងឺទឹកនោមផ្អែមនៅក្នុងឆ្នាំ ២០១៩ ហើយនៅត្រឹមឆ្នាំ ២០៤៥ ចំនួននេះ ត្រូវបានរំពឹងទុកថា នឹងកើនដល់ ៧០០ លាននាក់។ បើតាមការសិក្សាដដែល មនុស្សប្រមាណជា ៣៧៤ នាក់ កំពុងតែស្ថិតក្នុងហានិភ័យខ្ពស់ក្នុងការកើតជំងឺទឹកនោមផ្អែមកម្រិត២ ដែលជាបញ្ហាទូទៅនៃជំងឺនេះ។
ទឹកនោមផ្អែមកម្រិត១ កើតឡើង នៅពេលដែលប្រព័ន្ធភាពស៊ាំរបស់យើង ដែលជាប្រព័ន្ធប្រឆាំងនឹងការបង្ករជំងឺនានា ក្នុងរាងកាយ ធ្វើការវាយប្រហារ និងកម្ចាត់សារធាតុអាំងស៊ុយលីន។ ក្រុមអ្នកវិទ្យាសាស្ត្រ គិតថា កម្រិត១នេះ គឺបង្ករឡើងដោយហ្សេន បញ្ហាបរិស្ថាន និងវីរុសនានា។ ដោយឡែក ដើមហេតុដ៏ចម្បងនៃការនាំឲ្យកើតជំងឹទឹកនោមផ្អែមកម្រិត២ គឺទាក់ទងនឹងរបបអាហារ និងរបៀបរបបរស់នៅប្រចាំថ្ងៃរបស់យើង។ រោគសញ្ញានៃការកើតជំងឺទឹកនោមផ្អែមរួមមាន ស្រេកទឹក និងនោមញឹក មានអារម្មណ៍ឃ្លានជាងមុន អស់កម្លាំង ស្រវាំងភ្នែក ហើមប្រអប់ជើង និងដៃ មិនងាយសះរបួស និងស្រកទម្ងន់ជាដើម។
ដោយសារតែជំងឺទឹកនោមផ្អែម ភាគច្រើន កើតឡើងដោយសារតែរបបអាហារ និងរបៀបរបបរស់នៅប្រចាំថ្ងៃរបស់យើង ការមានរបបអាហារប្រកបដោយសុខភាពល្អ ពិតជាសំខាន់ណាស់ក្នុងការគេចឲ្យផុតពីការកើតជំងឺទឹកនោមផ្អែម។ ជាមួយគ្នានេះ បើយោងទៅតាមការសិក្សាថ្មីមួយដែលត្រូវបានចេញផ្សាយក្នុងទស្សនាវដ្តី Clinical Endocrinology & Metabolism អ្នកដែលបរិភោគផ្លែឈើទាំងមូល (មិនមែនចំរាញ់យកទឹក ឬទឹកផ្លែឈើ) ឲ្យបាន ២ ពេលក្នុង ១ ថ្ងៃ មានកម្រិតនៃការប្រឈមមុខនឹងការកើតជំងឺទឹកនោមផ្អែមកម្រិត២ តិចជាងរហូតដល់ទៅ ៣៦% ធៀបទៅនឹងអ្នកមិនញាំផ្លែឈើតិចជាង ១ លើកក្នុង ១ ថ្ងៃ។
លោកស្រី Nicola Bondonno វេជ្ជបណ្ឌិតនៅវិទ្យាស្ថានស្រាវជ្រាវចំណីអាហារនៃសាកលវិទ្យាល័យ Edith Cowan ក្នុងទីក្រុង Perth ប្រទេសអូស្ត្រាលី មានប្រសាសន៍ទាក់ទងនឹងករណីសិក្សាដែលលោកបានរកឃើញ និងចេញផ្សាយក្នុងទស្សនាវដ្តី Clinical Endocrinology & Metabolism ថា៖ «យើងបានឃើញថា អ្នកដែលបានបរិភោគផ្លែឈើ ២ លើក ក្នុង ១ ថ្ងៃ មានកម្រិតនៃការកើតជំងឺទឹកនោមផ្អែមកម្រិត២ ទាបជាងអ្នកបានញាំផ្លែឈើតិចជាង ២ លើកក្នុងមួយថ្ងៃ រហូតដល់ទៅ ៣៦% ក្នុងរយៈពេល ៥ ឆ្នាំបន្ទាប់។ ការរកឃើញនេះ បង្ហាញថា របបអាហារប្រកបដោយសុខភាព និងរបៀបរបបរស់នៅល្អ ក្នុងនោះរាប់បញ្ចូលទាំងការបរិភោគផ្លែឈើជាប្រចាំ គឺជាយុទ្ធសាស្ត្រដ៏មានប្រសិទ្ធិភាពក្នុងកាត់បន្ថយការប្រឈមមុខនឹងការកើតជំងឺទឹកនោមផ្អែមរបស់អ្នក»។
ក្រៅពីការបរិភោគផ្លែឈើជាប្រចាំ លោកអ្នកគួរតែកាត់បន្ថយការបរិភោគផ្អែម ធ្វើលំហាត់ប្រាណជាទៀងទាត់ ផឹកទឹកឲ្យបានច្រើន សម្រកទម្ងន់បើអ្នកឡើងទម្ងន់ខ្លាំង ឈប់ជក់បារី បរិភោគអាហារដែលមានសារធាតុសរសៃ និងវីតាមីន D ជាដើម។ បើអ្នកមានចំណុចណាមួយគួរឲ្យសង្ស័យ អ្នកគួរតែជួបគ្រូពេទ្យដើម្បីពិនិត្យ ឬអាចធ្វើការ ពិនិត្យសុខភាពជាប្រចាំដើម្បីធានាថា លោកអ្នកនៅតែមានសុខភាពល្អ និងមិនប្រឈមមុខនឹងជំងឺគ្រោះថ្នាក់នានា៕
ប្រភព៖ news.sabay.com.kh
គន្លឹះសុខភាព
ដើម្បីការរស់នៅប្រកបដោយសុខភាពល្អប្រសើរ!
គន្លឹះហិរញ្ញវត្ថុ
ដើម្បីការរៀបចំហិរញ្ញវត្ថុដ៏ឆ្លាតវៃ!
តើបច្ចុប្បន្នលោកអ្នកជាអតិថិជន មេនូឡាយហ្វ៍ ឬនៅ?