ព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុងលើកទី ២៩ នៅអង្គរវត្ត

តស់! សម្រាប់អ្នកកំពុងតែធ្វើ​ការ​ត្រៀមខ្លួនចូលរួមព្រឹត្តិការណ៍​រត់ប្រណាំងដ៏អស្ចារ្យនេះ នេះគឺជាព័ត៌មានដែលត្រូវបានសួរញឹកញាប់៖

1. អត្តពលិកត្រូវទៅដល់កន្លែងប្រកួតឲ្យបាន ៣០ នាទី មុនពេលការប្រកួតចាប់ផ្តើម។ ប្រសិនបើអ្នកជិះរ៉ឺម៉កកង់បី ពីទីរួមខេត្តសៀមរាប អ្នកនឹងត្រូវចំណាយ​ពេលប្រមាណ ២០នាទី ដូច្នេះសូមមេត្តាត្រៀមខ្លួនឲ្យបានរួចរាល់ និងលៃលកពេលវេលាសមស្រប ព្រោះផ្លូវទៅកាន់កន្លែងប្រកួតអាចនឹងមានភាពកកស្ទះ​ខ្លាំង។
2. នៅលើផ្លូវដែលអត្តពលិក​ត្រូវរត់ឆ្លងកាត់​ នឹង​មានកន្លែងផ្តល់ទឹកទទួលទានមួយ រាល់ចម្ងាយ ២ គីឡូម៉ែត្រ ហើយភេសជ្ជៈសម្រាប់បំពេញជាតិទឹក មាននៅស្តង់នីមួយៗរាល់ចម្ងាយ ២-៤ គីឡូម៉ែត្រ។ ប្រសិនបើអ្នកឃ្លាន អ្នកអាចពិសាផ្លែចេក ដែលមាននៅតាមស្តង់ចម្ងាយ ៦ គីឡូម៉ែត្រ ១០ គីឡូម៉ែត្រ និង ១៨ គីឡូម៉ែត្រ​ ដែលជាផ្លែឈើដ៏ល្អបំផុតសម្រាប់ផ្តល់កម្លាំងបន្ថែម!
3. សីតុណ្ហភាពនៅខេត្តសៀមរាបក្នុងខែធ្នូ​អាចនឹងមានចន្លោះពី ១៨ ទៅ ៣០ អង្សាសេ ដែលមានន័យថានៅពេលចាប់ផ្តើមរត់ ​​អាកាសធាតុនឹងត្រជាក់ ប៉ុន្តែអាកាសធាតុ​នឹងក្តៅជាង​មុន​នៅពេលបញ្ចប់។ ដូច្នេះចូរសម្រាកពិសាទឹកនៅតាមស្តង់ដែលផ្តល់ជូនឲ្យបានច្រើន!
4. សូមបញ្ជាក់ថា ផ្លូវរត់នេះនឹងត្រូវបិទទាំងស្រុងអំឡុងពេលកម្មវិធី ដើម្បីសម្រួលចរាចរណ៍ដល់អត្តពលិក និងបើកជាសាធារណៈដល់មហាជនវិញ ៣ ម៉ោងក្រោយពីកម្មវិធីត្រូវបានបញ្ចប់​!